સુરતમાં પોલીસની સરાહનીય કામગીરીઃ પાંડેસરા પોલીસે વર્ષ 2023માં ગુમ થયેલા 126 બાળકોને શોધ્યા, પરિવાર સાથએ કરાવ્યું મિલન
- 8:59 pm January 5, 2024
સુરતમાં પાંડેસરા પોલીસની સરાહનીય કામગીરી સામે આવી છે. પાંડેસરા પોલીસ મથક વિસ્તારમાંથી વર્ષ 2023 દરમિયાન ગુમ થયેલા 0થી 17 વર્ષના કુલ 126 બાળકોને પાંડેસરા પોલીસે શોધી તેઓનું પરિવાર સાથે મિલન કરાવ્યું છે.
સુરતમાં પાંડેસરા પોલીસ સ્ટેશન વિસ્તારમાં ઔધોગિક એકમો આવેલા છે. જ્યાં ઉતર પ્રદેશ, બિહાર, ઓરિસ્સા તેમજ અન્ય રાજ્યોમાંથી રોજગારી માટે લોકો આવી વસવાટ કરતા હોય છે.
ઘણા પરિવારમાં માતા-પિતા બંને કામ પર જતા હોય છે. ત્યારે તેઓના બાળકો ઘરે એકલા હોય છે અને આવા બાળકો રમતા રમતા ગુમ થઇ જતા હોય છે. ત્યારે પાંડેસરા પોલીસે ગુમ થયેલા કુલ 126 બાળકોને શોધી તેઓનું પરિવાર સાથે મિલન કરાવ્યું છે. વર્ષ 2023માં 0થી 17 વર્ષ સુધીના છોકરા અને છોકરી ગુમ થયા હોય તેવા બાળકોને પાંડેસરા પોલીસ દ્વારા તત્વરીત શોધી કાઢી તેઓનું પરિવાર સાથે મિલન કરાવ્યું છે.
ACP ઝેડ આર દેસાઈએ જણાવ્યું હતું કે, વર્ષ 2023માં નાના બાળકો ગુમ થવાની અથવા અપહરણ થવાની વિવિધ પ્રકારની ફરિયાદો મળી હતી. જેના ભાગરૂપે ઝોન-4ની ટીમ, એચ ડીવીઝન તેમજ પાંડેસરા પોલીસની ટીમ દ્વારા પ્રખર મહેનતના ભાગરૂપે વર્ષ દરમિયાન કુલ 126 બાળકોને શોધી કાઢવામાં આવ્યા છે. જ્યારે પણ બાળકો ગુમ થવાની કે અપહરણ થવાની કે કોઈ પણ ફરિયાદો પોલીસને મળતી હોય છે. ત્યારે પોલીસ સ્ટેશનના હાજર કર્મચારીઓ ગંભીરતા દાખવી સત્વરે રિસ્પોન્સ આપવાનું શરુ કરી દે છે. જેના ભાગરૂપે પાંડેસરા પોલીસ મથક વિસ્તારમાં વર્ષ દરમિયાન 126 બાળકોને તાત્કાલિક શોધી કાઢવામાં આવ્યા છે. પોલીસની આ કામગીરી પ્રસંસનીય છે.