સાબરકાંઠા જિલ્લા કલેક્ટર દ્વારા ધોરણ ૧૦ના વિદ્યાર્થીઓને સાકર અને પેન આપી સફળ પરીક્ષા આપવા અંગે શુભેચ્છા સંદેશ પાઠવ્યો..

સાબરકાંઠા જિલ્લા સહિત સમગ્ર રાજ્યમાં બોર્ડની પરીક્ષા તા. ૧૪ માર્ચ ૨૦23થી પ્રારંભ. સાબરકાંઠા જિલ્લા કલેક્ટર હિતેષ કોયાએ હિંમત હાઇસ્કુલ ખાતે વિદ્યાર્થીઓને સાકર અને પેન આપી સફળ પરીક્ષા આપવા અંગે શુભેચ્છા સંદેશ પાઠવ્યો હતો. 

તેમણે જણાવ્યુ હતુ કે વિદ્યાર્થી જીવનનો આ એક મહત્વનો પડાવ છે અને આગળ પણ આવા અનેક પડાવ આવવાના બાકી છે. સૌ વિદ્યાર્થીઓ ડરમુક્ત થઈને આત્મવિશ્વાસથી આ પરીક્ષા આપો તેવી સૌ કોઇને શુભેચ્છા પઠવું છું. આપ સૌ લક્ષ્ય નિર્ધારિત કરીને તણાવમુક્ત રહી ધ્યેયપ્રાપ્તિ માટે મહેનત કરશો તો સફળતા અચૂક મળશે. આપ સૌ ઉચ્ચ પરીણામ થકી આપની ઉજળી કારકિર્દીનું નિર્માણ કરશો તેવી આશા છે.

આ વર્ષે માર્ચમાં લેવાનારી બોર્ડની પરીક્ષામાં સાબરકાંઠા જિલ્લામાં એસ.એસ.સીના ૩૬ કેન્દ્રો પરથી ૨૬,૩૦૯ પરીક્ષાર્થીઓ પરીક્ષા આપશે. બોર્ડની પરીક્ષાના સુચારુ આયોજન માટે એસ એસ સીના હિંમતનગર અને ઇડર ઝોન બનાવવામાં આવ્યા છે. હિંમત હાઇસ્કુલ ખાતે જિલ્લા શિક્ષણ અધિકારી  મીતાબેન ગઢવી, હિંમત હાઇસ્કુલના પ્રમુખ ગોપાલસિંહ રાઠોડ, શિક્ષકગણ, રોટરી ક્લબના પ્રફુલ વ્યાસ,રમેશભાઇ પટેલ,ધવલભાઇ રાવલ દ્વારા દરેક વિદ્યાર્થીઓને પેન આપી  આત્મવિશ્વાસથી પરીક્ષા આપવા માટે શુભેચ્છઓ પાઠવી હતી.