સુરતના વરાછા ઝોનમાં સીતાનગર પે એન્ડ પાર્કમાંથી ખાણી પીણીની લારીઓ જપ્ત..

સુરત મહાનગરપાલિકા દ્વારા ટ્રાફિકની સમસ્યા ઘટાડવા માટે કોન્ટ્રાક્ટ પર અપાયેલા પે એન્ડ પાર્ક જ ટ્રાફિક માટે સમસ્યાનું કારણ બની રહ્યાં છે.

પાલિકાએ પે એન્ડ પાર્ક જાહેર કર્યા બાદ તેમાં વાહન પાર્કિંગની જગ્યા ખાણી પીણીની લારીઓ, વાહનો અને ધંધાદારી દબાણ તતાં લોકોએ ના છુટકે રસ્તા પર વાહન પાર્ક કરવા પડે છે. પાલિકા તંત્ર દ્વારા આવા પે એન્ડ પાર્કના કોન્ટ્રાક્ટર સામે પગલાં નહી ભરતા ટ્રાફિક સમસ્યા વકરી રહી છે, જોકે વરાછા ઝોને પે એન્ડ પાર્કમાં થતા દબાણ દુર કરવાની શરૂઆત કરી છે. સતત બીજા દિવસે વરાછા ઝોને કિરણ ચોક બાદ સીતા નગર ફ્લાય ઓવર નીચે બનેલા પે એન્ડ પાર્ક માંથી ખાણી પીણીની લારીઓ ઉઠાવી લીધી છે. જો વરાછા ઝોન પે એન્ડ પાર્ક માંથી ધંધાદારી દબાણ દુર કરી શકતું હોય તો અન્ય ઝોન દ્વારા આવા પગલાં કેમ ભરવામા આવતા નથી ? તે મુજબના પ્રશ્ન સાથે તમામ પે એન્ડ પાર્ક માત્ર પાર્કિંગ માટે જ ખુલ્લા કરવા માગણી થઈ રહી છે.

સુરત મહાનગરપાલિકાએ શહેરમાં થતા પાર્કિંગ અને ટ્રાફિકની સમસ્યા દૂર કરવા માટે પે એન્ડ પાર્ક જાહેર કરીને તેના કોન્ટ્રાક્ટ પણ આપ્યા છે. કેટલીક જગ્યાએ પે એન્ક પાર્ક નું સંચાલન સારી રીતે થાય છે પરંતુ કેટલાક પે એન્ડ પાર્ક વિવાદનું કેન્દ્ર બની રહ્યાં છે. સુરતના અનેક પે એન્ડ પાર્કમાં ધંધાદારી દબાણ થતું હોવાની ફરિયાદ થઈ રહી છે. બે દિવસ પહેલાં વરાછા ઝોનના કિરણ ચોક પે એન્ડ પાર્કમાં આઈસ ડીશ તથા અન્ય લારીઓ ઉભી રાખતા હોવાની ફરિયાદ બાદ વરાછા ઝોને કડકાઈ દાખવીને આ દબાણ દૂર કરીને પાર્કિંગ શરૂ કરાવી દીધા હતા. ત્યારબાદ વરાછા વિસ્તારમાં ટ્રાફિક થી ધમધમતા સીતાનગર ફ્લાય ઓવર નીચે પણ પે એન્ડ પાર્કમાં ખાણી પીણીની લારીઓ ઉભી રાખીને તેમની પાસે પૈસા વસુલાતા હોવાની ફરિયાદ બહાર આવી હતી. વરાછા ઝોને આ ફરિયાદ મળતા તાત્કાલિક સીતા નગર ફ્લાય ઓવરબ્રિજ નીચે પે એન્ડ પાર્કમાં ઉભી રખાતી ખાણી પીણીની લારીઓ જપ્ત કરી કોન્ટ્રાક્ટરને પે એન્ડ પાર્કમાં વાહનો પાર્ક થવા જોઈએ તેવી સૂચના આપી છે.

પાલિકાના વરાછા ઝોને પે એન્ડ પાર્કમાં ધંધાદારી દબાણ થાય છે તેવી ફરિયાદ બાદ તાત્કાલિક ખાણી પીણીની લારીઓ હટાવીને પે એન્ડ પાર્કમાં વાહનો પાર્ક કરાવવાનું શરૂ કરી દીધું છે. પરંતુ પાલિકાના અઠવા અને રાંદેર ઝોન સહિત અન્ય ઝોનમાં પે એન્ડ પાર્કમાં હજી પણ ધંધાદારી દબાણ થઈ રહ્યાં છે. ઓન સ્ટ્રીટ પાર્કિંગ માં પણ ખાણી પીણીના વાહનો ઉભા રખાતા હોવાથી ટ્રાફિકની સમસ્યામાં વધારો થઈ રહ્યો છે. જો વરાછા ઝોન પે એન્ડ પાર્ક માંથી ધંધાદારી દબાણ હટાવી શકતા હોય તો અન્ય ઝોન દ્વારા આવા દબાણો કેમ હટાવવામાં આવતું નથી ? અન્ય ઝોનમાંથી પે એન્ડ પાર્કમાં થતાં દબાણ માટે ઝોનના કેટલાક કર્મચારીઓ અને દબાણ કરનારાઓની મીલી ભગત હોવાથી આ દબાણ દુર થતા નથી તેના કારણે આવા તમામ પે એન્ડ પાર્ક ની તપાસ કરીને તેમાંથી દબાણ હટાવવા માટેની માગણી થઈ રહી છે.